نتيجة الإستفتاء و الاتنين مليون

بصوا بقى علشان أنا ابتديت أتفقع من الكلام بتاع "لازم نقبل النتيجة" ده.
اللي عايز يصدق نسبة نعم بتاعة ال77% على راسي من فوق... بس انتوا فعلا مصدقين الاتنين مليون اللي مفروض انهم صوتوا في القاهرة؟!


أنا هاسيبني خالص من المحافظات الأخرى رغم اهميتها، لإن موضوع القاهرة ده بالذات رافعلي الضغط.


يعني أكتر عدد لجان للإستفتاء موجود في القاهرة و اغلبهم فضل زحمة طول اليوم و منهم اللي اضطر يقفل بعد معاده... و يطلع اللي صوتوا 2 مليون بس؟!


يعني الأقباط بس مش أقل من 6 مليون و نسبة كبيرة منهم عايشين في القاهرة، و يطلع اللي صوتوا 2 مليون بس؟!


يعني اسكندرية تعدادها حوالي ربع تعداد القاهرة و حسب كلامهم صوت فيها مليون و نص، و يطلع اللي صوت في القاهرة 2 مليون بس؟!


و بعدين بلاش كل ده، اللي راحوا التحرير على طول الثورة مش اقل من 4 مليون...
و لاحظ يا محترم إن اللي راحوا التحرير دول مكانوش مقطوعين من شجرة، دول ليهم أهل. و رغم إن في من الاهل دول اللي طلعوا عنيهم في الأول بس بعد مبارك ماتخلي عن الحكم نسبة كبيرة منهم بقوا في صف "الولاد الأبطال" اللي راحوا مظاهرات التحرير.
يعني أقل واجب كان إنهم يروحوا الإستفتاء...


و مش هاقولك يصوتوا بـلا لأن أكيد في شباب من اللي نزلوا التحرير قالوا آه - و لو إني أدعي إنهم إما أقلية مثقفة (مع احترامي لرأيهم و عدم إقتناعي بيه في نفس الوقت) أو إخوان (مع احترامي ليهم برضه).
بس عالأقل الناس دي كلها كانوا رايحين الاستفتاء بأهاليهم و أقاربهم.


بس اللي راح حسب النتيجة الرسمية 2  مليون.
أو 2  مليون و 300 ألف للدقة.


معلش، بس أنا مش هأقدر آكل من الكلام ده خالص، و مش فاهم الناس مقتنعة بيه إزاي.


و أحب الفت النظر إلى إن النتيجة بنعم - و اللي كانت متوقعة بالمناسبة - كان ممكن اقبلها بسهولة. احنا أصلا (بتوع لأ) كنا نفسيا جاهزين للهزيمة لما النتائج المبدئية ابتدت تتقال.


بس الأرقام دي تثير الشك.
و لو النتيجة كانت نعم فعلا بنسبة المشاركة المنطقية، ليه يطلعوا لنا النسبة المسخرة دي؟
آه و بالمناسبة لو نسبة المشاركة في القاهرة فعلا كانت قليلة كده، قعدوا كل ده لغاية مطلعوها ليه؟ مع العلم إن فيه محافظات عدد لجانها اقل و خلصت بدري.


الناس اللي شايفة إن اللجنة القضائية دي كلها فوق مستوى الشبهات، أعذروني بس أنا - من حيث المبدأ على الأقل -  مش شايف الفرق بين حضراتكم و الناس بتاعة "أزهى عصور الديمقراطية" أيام تزوير مبارك.


و أعذروني... بس أنا مش هاقبل النتيجة دي.
مش هتظاهر ولا أي حاجة شبيهة... بس مش ناوي "أبقى واقعي" و أبتدي "أفكر لقدام" دلوقتي.
نفسيا مش قادر، لاني حاسس إني مضحوك عليَّ.


معلش، بس ارجوك
يا تاخدني على قد عقلي، يا تساعدني أفهم الرقم ده جه منين. أو بالأصح تفهمني الأصوات دي راحت فين...


و شكرا